ຄະນະໂຄສະນາອົບຮົມແຂວງ ເຂົ້າຮ່ວມ ກອງປະຊຸມຄົບຄະນະບໍລິຫານງານເປີດກວ້າງກາງສະໄໝທີ VI ຂອງອົງຄະນະພັກເມືອງ ທ່າແຕງ

ລາຍລະອຽດ

ສ້າງຂື້ນເມື່ອ ວັນພະຫັດ, 22 ກັນຍາ 2022 08:22

ຂຽນໂດຍ Darling

          ທ່ານ ແສງຄຳ ສຸວັນແດງ ຄະນະໂຄສະນາອົບຮົມແຂວງ ໄດ້ເຂົ້າຮ່ວມກອງປະຊຸມຄົບຄະນະບໍລິຫານງານເປີດກວ້າງກາງສະໄໝທີ  VI ຂອງອົງຄະນະພັກເມືອງທ່າແຕງ, ເຊິ່ງໄດ້ໄຂຂຶ້ນໃນເວລາ 08:00 ໂມງ ເຊົ້າຂອງວັນທີ 20 ກັນຍາ 2022. ພາຍໃຕ້ການເປັນປະທານຮ່ວມຂອງ ທ່ານ ນາງ ບຸນຮຽງ ບຸນຈິດ ກຳມະການປະຈຳພັກແຂວງ ປະທານແນວລາວສ້າງຊາດແຂວງ ແລະ ທ່ານ ສົມເພັດ ເອີດລັດດາ ກໍາມະການພັກແຂວງ, ເລຂາພັກເມືອງ, ເຈົ້າເມືອງ ເມືອງທ່າແຕງ ພ້ອມດ້ວຍບັນດາຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການອ້ອມຂ້າງເມືອງ, 6 ເຂດຈຸດສຸມພັດທະນາ, ພະນັກງານອາວຸໂສບຳນານ ແລະ ເລຂາຄະນະພັກຮາກຖານ 47 ບ້ານພາຍໃນເມືອງທ່າແຕງເຂົ້າຮ່ວມ.

          ໃນກອງປະຊຸມດັ່ງກ່າວ ທ່ານ ແສງລາຕີ ຫຼອມຍະເດດ ຮອງເລຂາພັກເມືອງ ໄດ້ຜ່ານຮ່າງບົດສະຫລຸບ ນຳພາ-ຊີ້ນຳ 6 ເດືອນຕົ້ນປີ 2022  ແລະທິດທາງສືບຕໍ່ 6 ເດືອນທ້າຍປີ 2022, ທ່ານ ສຸພົນ ໄຊສະຫງ່າ ຮອງເຈົ້າເມືອງ ໄດ້ຜ່ານຮ່າງບົດສະຫຼຸບແຜນພັດທະນາເສດຖະກິດ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022, ທ່ານ ລົດແກ້ວ ເພັງພູນສະຫວັດ ຮອງເລຂາພັກເມືອງ ໄດ້ຜ່ານຮ່າງ ບົດສະຫຼຸບນໍາພາ-ຊີ້ນຳໄລຍະເຄິ່ງສະໄໝ ແຕ່ປີ 2020-ເດືອນ ພຶດສະພາ 2022 ແລະ ທິດທາງສືບຕໍ່ຮອດປີ 2024, ທ່ານ ແສງສຸບັນ ໄຊສະຫວັນ ຄະນະປະຈຳ ພັກເມືອງ ຮອງເຈົ້າເມືອງ ໄດ້ຜ່ານຮ່າງບົດສະຫຼຸບແຜນພັດທະນາເສດຖະກິດ-ສັງຄົມເຄິ່ງສະໄໝ ແຕ່ປີ 2020 ເດືອນ ພຶດສະພາ 2022 ແລະ ທິດທາງປີ 2024.

          ໃນໂອກາດນີ້ ທ່ານ ສົມເພັດ ເອີດລັດດາ ກຳມະການພັກແຂວງ ເລຂາພັກເມືອງເຈົ້າເມືອງທ່າແຕງ ໄດ້ມີຄຳເຫັນເຈາະຈີ້ມໃນການປະກອບ ຮ່າງບົດສະຫຼຸບ ແລະ ທ່ານຍັງໄດ້ເນັ້ນໜັກໃຫ້ແຕ່ລະພາກສ່ວນເອົາໃຈໃສ່ ຈັດຕັ້ງປະຕິບັດວຽກງານຂອງຕົນໃຫ້ບັນລຸຕາມຄາດໝາຍທີ່ກຳນົດໄວ້, ໃຫ້ເພີ່ມທະວີການນຳພາຂອງອົງຄະນະພັກໃນການສ້າງເມືອງທີ່ມີລະບົບການເມືອງທີ່ເຂັ້ມແຂງ, ເປັນແຫຼ່ງຜະລິດກະສິກຳທີ່ ສະອາດ, ປອດສານພິດ, ໃຫ້ຢຸດຕິການຖາງປ່າເລື່ອນລອຍ ສ້າງເມືອງໃຫ້ກາຍເປັນເມືອງສີຂຽວ ແລະ ເປັນແຫຼ່ງທ່ອງທ່ຽວທາງລະບົບນິເວດ.

              ກອງປະຊຸມໄດ້ດໍາເນີນໄປເປັນເວລາ 2 ວັນເຕັມ ແລະ ໄດ້ປິດລົງດ້ວຍຜົນສໍາເລັດຢ່າງຈົບງາມ.

• < ຕໍ່ໄປ
• ຕໍ່ໄປ >