ແຂວງເຊກອງ ເປີດຊຸດຝຶກອົບຮົມການເມືອງ-ແນວຄິດ ໃຫ້ຄູ-ອາຈານ ສອນວິຊາສັງຄົມ-ການເມືອງ.

ລາຍລະອຽດ

ສ້າງຂື້ນເມື່ອ ວັນອັງຄານ, 19 ກັນຍາ 2023 07:49

ຂຽນໂດຍ Darling

       ວັນທີ 6-7 ກັນຍາ 2023 ຢູ່ຫ້ອງປະຊຸມຂອງພະແນກສຶກສາທິການ ແລະ ກິລາແຂວງ, ຄະນະໂຄສະນາອົບຮົມແຂວງໄດ້ເປີດຊຸດຝຶກອົບຮົມການເມືອງ-ແນວຄິດໃຫ້ຄູ-ອາຈານ ໂຮງຮຽນມັດທະຍົມອ້ອມຂ້າງແຂວງ, ໂຮງຮຽນມັດທະ ຍົມຢູ່ເມືອງລະມາມ ແລະ ໂຮງຮຽນມັດທະຍົມຢູ່ເມືອງທ່າແຕງ ທີ່ສອນວິຊາສັງຄົມ-ການເມືອງ. ພາຍໃຕ້ການເຂົ້າຮ່ວມເປັນປະທານຂອງ ທ່ານ ນາງ ສີສະຫງ່າ ແກ້ວດວງດີ ກໍາມະການປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງມີທ່ານ ນາງ ສຸກສະຫວັນ ອິນຄະວິໄລ ຮອງຫົວໜ້າກົມອົບຮົມຄະນະໂຄສະນາອົບຮົມສູນກາງພັກ ແລະ ທ່ານ ບຸນເຫຼືອ ແກ້ວມະນີໄລ ຮອງຫົວໜ້າພະແນກສຶກສາທິການ ແລະ ກິລາແຂວງ, ພ້ອມດ້ວຍນັກສຳມະນາກອນເຂົ້າຮ່ວມ ທັງໝົດ 48 ທ່ານ, ຍິງ 17 ທ່ານ.

      ໃນພິທີດັ່ງກ່າວ ວິທະຍາກອນຈາກສູນກາງ ແລະ ວິທະຍາກອນຂັ້ນແຂວງ ໄດ້ຜ່ານ 6 ເອກະສານ ແລະ ສົນທະນາແລກປ່ຽນ-ຖອດຖອນບົດຮຽນ ກັບນັກສຳມະນາກອນ ກຽ່ວກັບເນື້ອໃນເອກະສານດັ່ງນີ້:

1. ບົດທີ 1 ຄວາມຮູ້ພື້ນຖານກ່ຽວກັບລັດທິມາກ-ເລນິນ.
2. ບົດທີ 2 ຊາດລາວ, ຄົນລາວ ແລະ ມູນເຊື້ອອັນສະຫງ່າລາສີຂອງປະຊາຊົນ.
3. ບົດທີ 3 ການສ້າງ ແລະ ບູລະນະລະບອບປະຊາທິປະໄຕ ປະຊາຊົນຕາມທິດສັງຄົມນິຍົມ.
4. ບົດທີ 4 ແນວທາງນະໂຍບາຍການສຶກສາຂອງພັກ-ລັດເຮົາ.
5. ບົດທີ 5 ພັດທະນາເສດຖະກິດ ຕິດພັນກັບການພັດທະນາວັດທະນະທຳ-ສັງຄົມ ແລະ ສິ່ງແວດລ້ອມ.
6. ບົດທີ 6 ຈັນຍາບັນຄູ.

ເຊິ່ງການເປິດຝຶກອົບຮົມໃນຄັ້ງນີ້ ແມ່ນເພື່ອຍົກລະດັບ ໃຫ້ຄູ-ອາຈານທີ່ສອນ ວິຊາສັງຄົມ-ການເມືອງ ມີຄວາມຮູ້, ຄວາມເຂົ້າໃຈ ຕໍ່ກັບວຽກງານການເມືອງ-ແນວຄິດ ຢ່າງເລິກເຊິ່ງເຖິງຖອງ ແລະ ສາມາດ ນຳໄປຈັດຕັ້ງປະຕິບັດເຂົ້າກັບການຮຽນໂດຍສະເພາະສຶກສາອົບຮົມການເມືອງ-ແນວຄິດ ໃຫ້ນັກຮຽນໃນຄວາມຮັບຜິດຊອບຂອງຕົນໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ.

ໃນໂອກາດນີ້ ທ່ານ ນາງ ສີສະຫງ່າ ແກ້ວດວງດີ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ ໄດ້ມີຄຳເຫັນໂອລົມ ພິທີຝຶກອົບຮົມຄັ້ງນີ້ມີຄວາມໝາຍຄວາມສຳຄັນເປັນການສ້າງເງື່ອນໄຂໃຫ້ ຄູ-ອາຈານໄດ້ມີໂອກາດຖອດຖອນບົດຮຽນເຊິ່ງກັນ ແລະ ກັນດ້ວຍລັກສະນະສ້າງສັນ ເຮັດໃຫ້ການຝຶກອົບຮົມດຳເນີນໄປດ້ວຍບັນຍາກາດຝົດຟື້ນ, ສະແດງໃຫ້ເຫັນເຖິງຄວາມເອົາໃຈໃສ່ ແລະ ຄວາມຮັບຜິດຊອບຂອງຄູຝຶກ ແລະ ນັກສຳມະນາກອນທີ່ໄດ້ມີສ່ວນຮ່ວມໃນການແລກປ່ຽນກ່ຽວກັບເນື້ອໃນຂອງບັນດາເອກະສານທີ່ໄດ້ນຳມາເຜີຍແຜ່. ພ້ອມນີ້ທ່ານຍັງໄດ້ເນັ້ນໜັກໃຫ້ນັກສຳມະນາກອນນຳເອົາບົດຮຽນຈາກການຝຶກອົບຮົມສຶບຕໍ່ຈັດຕັ້ງປະຕິບັດໃນວຽກງານຕົວຈິງຂອງຕົນເອງໃຫ້ເກີດດອກອອກຜົນ, ສືບຕໍ່ຜັນຂະຫຍາຍໃຫ້ຄູ-ອາຈານທີ່ບໍ່ໄດ້ເຂົ້້າຮ່ວມການຝຶກອົບຮົມໃນຄັ້ງນີ້, ນຳໄປຖ່າຍທອດຄວາມຮູ້ໃຫ້ແກ່ນ້ອງນັກຮຽນທີ່ຢູ່ໃນຄວາມຮັບຜິດ ຊອບ  ຂອງຕົນຢ່າງປະດິດສ້າງ ເພື່ອປູກຈິດສຳນຶກໃຫ້ເດັກມີນ້ຳໃຈຮັດຊາດ, ຮັກພໍ່-ແມ່, ຮັກທ່ານຜູ້ນໍາ. ເພາະການເຮັດວຽກງານການເມືອງ-ແນວຄິດ ເຮົາຈະບໍ່ສາມາດສ້າງຄວາມເຂົ້າໃຈກັບບຸກຄົນໃດໜຶ່ງໃນເວລາສັ່ນໆໄດ້ ສະນັ້ນການເຮັດວຽກງານການເມືອງ-ແນວຄິດແມ່ນຕ້ອງເຮັດຢ່າງຕໍ່ເນື່ອງ.

• < ຕໍ່ໄປ
• ຕໍ່ໄປ >