ແຂວງເຊກອງ ເປີດຊຸດຮຽນທິດສະດີການເມືອງ ລະບົບຂັ້ນຕົ້ນ ຮຸ່ນທີ II ປະຈຳປີ 2023

ລາຍລະອຽດ

ສ້າງຂື້ນເມື່ອ ວັນອັງຄານ, 19 ກັນຍາ 2023 08:07

ຂຽນໂດຍ Darling

       ໃນຕອນເຊົ້າ ຂອງວັນທີ 12 ກັນຍາ 2023 ເວລາ 8:30 ໂມງ ທ່ານ ນາງ ສີສະຫງ່າ ແກ້ວດວງດີ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ ໄດ້ໃຫ້ກຽດເຂົ້້າຮ່ວມເປັນປະທານ ໃນພິທີ ເປີດຊຸດຮຽນທິດສະດີການເມືອງລະບົບຂັ້ນຕົ້ນ ຮຸ່ນທີ II ປະຈຳປີ 2023 ເຊິ່ງໄດ້ຈັດຂື້ນຢູ່ທີ່ ຫ້ອງປະຊຸມຊັ້ນ II ຂອງໂຮງຮຽນການເມືອງ-ການປົກຄອງແຂວງເຊກອງ, ເຊິ່ງມີຄະນະອຳນວຍການ ພ້ອມດ້ວຍຄູ-ອາຈານ ຂອງໂຮງຮຽນການເມືອງ-ການປົກຄອງແຂວງ, ບັນດາທ່ານຄະນະພະແນກການທີ່ກ່ຽວຂ້ອງ, ນັກສຶກສາທິດສະດີການເມືອງລະບົບຂັ້ນຕົ້ນ ຮຸ່ນທີ II ເຂົ້້າຮ່ວມທັງໝົດ 73 ທ່ານດ ຍິງ 31 ທ່ານ.

      ໃນພິທີດັ່ງກ່າວຄະນະຮັບຜິດຊອບ ໄດ້ຜ່ານມະຕິຕົກລົງ ຂອງຄະນະປະຈຳພັກແຂວງ ສະບັບເລກທີ 539/ຄປພຂ.ຊກ,  ລົງວັນທີ 30 ສິງຫາ 2023   ວ່າດ້ວຍອະນຸມັດໃຫ້ພະນັກງານໄປຮຽນ ທິດສະດີການເມືອງ-ການປົກຄອງຂັ້ນຕົ້ນຮຸ່ນທີ II ປະຈຳປີ 2023 ຈຳນວນ 55 ທ່ານ, ຍິງ 24 ທ່ານ. ພ້ອມກັນນັ້ນກໍໄດ້ຜ່ານແຜນຈັດຕັ້ງປະຕິບັດໂຄງການຫຼັກສູດການຮຽນການສອນທິດສະດີການເມືອງ ລະບົບຂັ້ນຕົ້ນ ຮຸ່ນທີ II ປະຈຳປີ 2023. ໄລຍະການຮຽນແມ່ນ 3 ເດືອນ ມີ 8 ກຸ່ມວິຊາຮຽນ ປະກອບ 12 ວິຊາ ແລະ 5 ບົດລາຍງານ ມີ 15 ໜ່ວຍກິດ 418 ຊົ່ວໂມງ ແລະ ມີຄູ-ອາຈານສິດສອນທັງໝົດ 21 ທ່ານ, ຍິງ 6 ທ່ານ.

      ຕອນທ້າຍຂອງພິທີ ທ່ານ ນາງ ສີສະຫງ່າ ແກ້ວດວງດີ ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ ໄດ້ມີຄຳເຫັນໂອ້ລົມຕໍ່ ພິທີ ເຊິ່ງທ່ານໄດ້ຍົກໃຫ້ເຫັນ ຄວາມສຳຄັນໃນການຮຽນ-ການສອນ, ເພື່ອສ້າງທັດສະນະແນວຄິດຫຼັກໝັ້ນຊົນຊັ້ນການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີແບບແຜນດຳລົງຊີວິດ ແລະ ສົມທົບກັບພຶດຕິກຳຕົວຈິງ.ນອກຈາກນີ້ ທ່ານຍັງໄດເນັ້ນໜັກໃຫ້ນັກສຶກສາເປັນເຈົ້າການຄົ້ນຄວ້າຮ່ຳຮຽນ, ໃຊ້ເວລາໃຫ້ເປັນປະໂຫຍດ, ເວລາວ່າງຕ້ອງຊອກຮູ້ຈາກຫຼາຍພາກສ່ວນ, ທັງພາຍໃນ ແລະ ນອກໂຮງຮຽນ, ເປັນຕົ້ນໃນຫ້ອງສະໜຸດ, ໝູ່ເພື່ອນ ແລະ ອື່ນໆ.

• < ຕໍ່ໄປ
• ຕໍ່ໄປ >