ພິທີມອບ-ຮັບ ໜ້າທີ່ ຫົວໜ້າຄະນະໂຄສະນາອົບຮົມ ແຂວງ ເຊກອງ

      ໃນວັນທີ 8/10/2020 ຜ່ານມາ ຄະນະໂຄສະນາອົບຮົມແຂວງ ໄດ້ຈັດພິທີ ມອບ-ຮັບ ໜ້າທີ່ລະຫວ່າງ ທ່ານ ດາວວີ ສວຍທະລັງສີ ກໍາມະການພັກແຂວງ ອາດີດ ຫົວໜ້າຄະນະໂຄສະນາອົບຮົມແຂວງ ກັບ ທ່ານ ນາງ ສີສະຫງ່າ ແກ້ວດວງດີ ກໍາມະການພັກແຂວງ ອາດີດຫົວໜ້າຄະນະຈັດຕັ້ງແຂວງ. ມາຮັບໜ້າທີ່ເປັນ ຫົວໜ້າຄະນະໂຄສະນາອົບຮົມແຂວງ ໂດຍການເຂົ້າຮ່ວມເປັນປະທານຂອງ ທ່ານ ນາງ ຈັນຫອມ ມະຫາໄຊ ຄະນະປະຈໍາພັກແຂວງ, ຮອງເລຂາພັກແຂວງ, ມີແຂກຖຶກເຊີນຈາກພະແນກການອ້ອມຂ້າງແຂວງ(ຂົງເຂດພັກ-ພະນັກງານ) ພ້ອມດ້ວຍພະນັກງານລັດຖະກອນ ຂອງ ຄະນະໂຄສະນາອົບຮົມແຂວງທັງໝົດ.

           ໂອກາດນີ້ ທ່ານ ດາວວີ ສວຍທະລັງສີ ໄດ້ຜ່ານບົດລາຍງານໂດຍຫຍໍ້ ຜົນງານ ການເຄື່ອນໄຫວຕະຫຼອດໄລຍະ 5 ປີ ທີ່ຜ່ານມາທີ່ໄດ້ຊີ້ນໍາ-ນໍາພາ ການຈັດຕັ້ງປະຕິບັດໜ້າທີ່ການເມືອງຂອງຕົນ, ສຶກສາອົບຮົມຈັດຕັ້ງ ຜັນຂະຫຍາຍບັນດາມະຕິຄຳສັ່ງຂອງພັກ, ລະບຽບກົດໝາຍຂອງລັດ ໂດຍສະເພາະມະຕິກອງປະຊຸມຄັ້ງທີ 9,10 ຂອງແຂວງ ມະຕິກອງປະຊຸມໃຫຍ່ຄັ້ງທີ 10 ຂອງພັກ ແລະ ມະຕິກອງປະຊຸມໃຫຍ່ຄັ້ງທີ 5 ຂອງໜ່ວຍພັກຮາກຖານຄະນະໂຄສະນາອົບຮົມແຂວງ ດ້ວຍຫຼາຍຮູບການ, ເຮັດໃຫ້ພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ ໄດ້ມີຄວາມຮັບຮູ້, ຕື່ນຕົວທາງດ້ານການເມືອງຫຼາຍຂື້ນກວ່າເກົ່າ ແລະ ຜົນສຳເລັດຫຼາຍດ້ານ.

         ຫຼັງຈາກນັ້ນ, ທ່ານ ນາງ ຈັນຫອມ ມະຫາໄຊ ກໍໄດ້ໃຫ້ກຽດມີຄໍາເຫັນໂອ້ລົມ ເພື່ອເປັນເຂັມຊີ້ທິດເຍືອງທາງ, ໂດຍສະເພາະແມ່ນເນັ້ນໜັກ ຫົວໜ້າຄະນະໂຄສະນາອົບຮົມແຂວງ ຜູ້ໃໝ່ ໃຫ້ເອົາໃຈໃສ່ຊີ້ນໍາ-ນໍາພາ ວຽກງານໂຄສະນາໃຫ້ພົ້ນເດັ່ນຂື້ນກວ່າເກົ່າ ນໍາເອົາເຕັກໂນໂລຊີທີ່ທັນສະໄໝ ເຂົ້າມາເປັນສ່ວນໜຶ່ງໃນການເຜີຍແຜ່ວຽກງານໂຄສະນາ ໃຫ້ກ້ວາງຂວາງ ແລະ  ເຂົ້າເຖິງ ພະ ນັກງານ, ສະມາຊິກພັກ ຕະຫຼອດຮອດພໍ່ແມ່ປະຊາຊົນບັນດາເຜົ່າ ໃຫ້ຮັບຮູ້, ເຂົ້າໃຈ ແລະ ເຊື່ອມຊຶມ ແນວ ທາງນະໂຍບາຍຂອງພັກທີ່ໄດ້ວາງອອກຢ່າງຖຶກຕ້ອງ.